विमानतळावरून सुरू करण्यात आलेल्या विमान सेवेमुळे मराठवाड्यातील  नागरिकांना स्वस्तात विमान प्रवास करण्याची संधी उपलब्ध होत आहे. रेल्वेच्या 'एसी फर्स्ट क्लास' वर्गाच्या तिकीट दरापेक्षा कमी दरात हा प्रवास होत आहे. त्यामुळे कमी कालावधीत मुंबईहून औरंगाबाद गाठता येत आहे. दिल्ली ते औरंगाबाद या विमान प्रवासाचेही सध्याचे दर कमी करण्यात आले आहेत.

औरंगाबाद विमानतळावरून गेल्या काही महिन्यांत विमानांची संख्या वाढली आहे. औरंगाबदहून अहमदाबाद, हैदराबाद, दिल्ली, मुंबई, उदयपूर या शहरांसाठी हवाई प्रवासाच्या सेवा उपलब्ध करून दिल्या आहेत. दोन महिन्यांपूर्वी औरंगाबाद ते मुंबई या मार्गावर हवाई प्रवासासाठी नऊ ते १८ हजार रुपयांदरम्यान भाडे आकारण्यात येते होते. विमान कंपन्यांनी सुरू केलेल्या नव्या विमान सेवांमुळे हे दर कमी करण्यात आले आहेत.

दिल्लीला जाण्यासाठी औरंगाबादहून सचखंड एक्स्प्रेस आणि मराठवाडा संपर्क क्रांती या दोन रेल्वे उपलब्ध आहे. मराठवाडा संपर्क क्रांती एक्स्प्रेस रेल्वे आठवड्यातून एकदा धावते. सचखंड एक्स्प्रेसमधून दिल्लीहून औरंगाबादला येण्यासाठी 'एसी टू टायर'मध्ये दोन हजार ३०० रुपये प्रती प्रवासी मोजावे लागत आहेत. विमानाने दिल्लीहून औरंगाबाद गाठण्यासाठी विमान प्रवाशांना एक हजार ६०२ रुपयांपासून ते तीन हजार ९८ रुपयांपर्यंत भाडे आकारण्यात येत आहे. मागणी वाढल्यास या दरात काही प्रमाणात बदल होण्याची शक्यताही वर्तविण्यात येत आहे. रेल्वेच्या दरापेक्षाही विमानाचे दर कमी झाल्याने, याचा थेट फायदा विमान प्रवाशांना होत आहे.

औरंगाबादहून हैदराबादला जाण्यासाठी विमान दर कमी केले आहेत. काही विमान प्रवाशांना गेल्या दोन दिवसांपूर्वी ट्रू जेटच्या विमानाचे तिकीट एक हजार ३०० रुपयांपर्यंत मिळाले. सध्या हैदराबादच्या विमानाचे दरही कमी झाले असल्याची माहिती विमान कंपनीच्या प्रतिनिधींकडून देण्यात आली आहे. मार्च महिन्यात परीक्षा आणि मार्चअखेरची कामे असतात. या महिन्यातही विमान प्रवासाचे दर कमी राहण्याची शक्यता वर्तविण्यात येत आहे.